ماں جھان ءَ بلوچ دودمان ءُ ربیدگانی پیش دارگ ءَ نوکیں گلے جوڑ کنگ بوتگ، اے گل ءَ وتی سرگرمیانی بندات چہ نیدرلینڈز ءِ شھر ھوگوپین ءَ کرتگ۔
29 نومبر 2025ءَ ماں ھوگوپین ءَ بیتگیں جھانی دودمانی مراگش ءَ دودمان گل ءِ باسکاں سری بر ءَ بلوچ ءِ دودمان ءِ جھگیری کرت ءُ جتا جتائیں ڈیھانی نمائشانی نیام ءَ وتی پدریں بستار منارینت۔اے مراگاہ ءَ مردماں بلوچ ءِ ربیدگی چیز دوست داشت ءُ ساڑات اَنت۔
مراگش ءَ دودمان ءِ باسکاں بلوچ گْوستانک، ربیدگ، دوچ، بلوچی ساز ءُ وردناں ھوار دودمان ءِ جتائیں بھر گوں زیبا ءُ دلکشیں دروشمے ءَ پیش داشت انت۔
اے مراگش ءِ شرتریں رنگ ایش اَت کہ مراگش ءِ تہ ءَ بلوچ جنیناں ھم مزنیں کچے ءَ بھر زرت ءُ وتی ھدوناکی پیش داشت۔ جنیناں دوچی ئیں گد ءُ چیز، چہ ناہ ءَ جوڑ کرتگیں مدر، چانگال ءُ دگہ ورگ چوش کہ بانکلینک، ھیرا، نگن ءُ شیلانچ ایر کرتگ اَت۔ بلوچ جنینانی بود ءُ گشادی ءَ چاروکانی دلگوش گوں وت برت۔
اے نمائش ءَ بلوچی ساز سروز ءُ بینجو ھم ایر کنگ بوتگ اَنت۔ بلوچ نبشتہ کارانی کتاباں چاروک چہ بلوچستان ءِ گْوستانک، ندانک ( ادب ) ءُ دودمانی مڈیاں آشنا کنائینت اَنت۔
چاروکاں دودمان ءِ اے کار سک باز ساڑات اَنت۔چہ اے مراگش ءَ ناں ایوک ءَ بلوچ ءِ دود ءُ ربیدگانی بارہ ءَ سرپدی دات بلکیں جھانی تک ءَ دودمانی میان ءَ سیادیانی مگیم کنگ ءَ ھم وتی کرد پیلو کرت۔
دودمان ءِ بنجاھی راھوتکار باسط زھیر ءَ اے بارہ ءَ گْوشتگ اے مراگش بلوچ ءِ دودمان ءَ ماں جھان ءَ سر کنگ ءِ جْوانیں درے ات، ءُ مارا وشی بوت کہ میان راجی مھماناں اے سک باز دوست بوتگ ءُ ساڑاتگ اش۔
مراگش ءِ گڈسر ءَ مھمانانی واھگ اَت کہ اے وڑیں مراگش دیمتر ءَ ھم کنگ بہ بیت داں کہ جتائیں دودمانانی میان ءَ وت ماں وتی نزیکی ءُ منگہ بہ مان ایت۔
دودمان ءِ سری پجاری نیاد 30 نومبر ءَ برجم دارگ بوتگ، ایشی ءِ تہ ءَ چہ بلوچستان ءِ جتائیں ھلک ءُ دمگ ءُ ماں درانڈیھ جاھمنندیں بلوچاں بھر زرت۔ بھرزوروکاں ھمے واھگ درشانت کہ اے گل بلوچ ءِ دودمان ءِ درسیں تکاں چہ یک پترے ءَ جھان ءِ دیم ءَ گوں بلوچ ءِ راستیں پجار ءَ پیش کنت۔
بھر زوروکاں گْوشتت بلوچ ءِ دودمان ایوک ربیدگانی سر ءَ نہ اِنت بلکیں پراہ ءُ شاھگان اِنت۔ بلوچ ءِ ھزاراں سال کْوھنیں گْوست ءِ نشانی رودراتکی بلوچستان ءِ ھند سراوان ءِ کوھاں ھست اَنت ءُ مھرگڑ اے دمگ ءِ مزنشانیں دودمانی مڈی ءِ رژنائیں چیدگ اِنت۔
دودمان (گل ) ءِ مونوگرام ءِ تہ ءَ چہ مھرگڑ ءَ دزکپتگیں کلنڈیانی سر ءِ نگار ءُ بلوچی دوچ ھوار اَنت ۔ بنجاھی راھوتکار ءِ رد ءَ گل ءِ مونوگرام گوں بلوچ راج ءِ کْوھنیں گْوست ءَ بندوک اِنت۔ ایشی ءِ تہ ءَ ھواریں ھمک لیکار ءُ ھمک چیدگ ٹوھیں بزانتے دار ایت۔ بلوچی دوچ تناب ءِ ششیں رنگ زند ءِ جتا جتائیں جاور ءُ مولماں درانگاز اَنت، ءُ بلوچ جنینانی گْوستانکی کرد ءَ ساڑا اَنت۔
آئی ءَ دیمتر ءَ گْوشتگ کہ مھرگڑ بلوچ راج ءِ گْوستانکی مڈی اِنت ، اد ءَ چہ سرجمیں جھان ءِ مردمانی تہ ءَ بنداتی ئیں کشاورداں کشت ءُ کشار کرتگ۔ کلنڈیانی سر ءَ نگار اتگیں کائیگر آئی ءِ کانٹانی سر ءَ نشتگیں مرگ، رُژنائیں روچ ءُ سبزیں زمین وشھالیں راجے ءِ داستان ءَ کار اَنت۔
آئی ءِ رد ءَ دودمان درسیاسی ئیں گلے ءِ بستار ءَ زبان، دود ءُ ربیدگ، ندانک، گْوستانکی مڈی ءُ زیمر ءِ وڑیں تکاں کار کنت۔
